မြန်မာနိုင်ငံရဲ့နိုင်ငံခြားရင်းနှီးမြှုပ်နှံမှုစာရင်းမှာတရုတ်နိုင်ငံကနံပါတ်(၁)နေရာမှာ ရှိနေပြီး ရင်းနှီးမြှုပ်နှံမှုတန်ဖိုးက အမေရိကန်ဒေါ်လာသန်း(၁၈၀၀၀)ကျော်ရှိနေပြီဖြစ်တယ်လို့ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန(DICA)ရဲ့ထုတ်ပြန်ချက်အရသိရပါတယ်။ ယခု၂၀၁၇ခုနှစ် ဧပြီလကုန်အထိ DICA ကခွင့်ပြုထားတဲ့ နိုင်ငံခြားရင်းနှီးမြှုပ်နှံမှုများစာရင်းအရသိရတာပါ။တရုတ်နိုင်ငံ အနေနဲ့ မြန်မာနိုင်ငံမှာလုပ်ငန်းပေါင်း(၁၇၈)ခု လုပ်ကိုင်နေတာဖြစ်ပြီး တရုတ်နိုင်ငံရဲ့ ရင်းနှီးမြှုပ်နှံမှု ဟာ နိုင်ငံခြားရင်းနှီးမြှုပ်နှံမှု တန်ဖိုးစုစုပေါင်းရဲ့ (၂၆)ရာခိုင်နှုန်းကျော် အထိရှိတယ်လို့ သိရပါတယ်။


ဒုတိယနေရာမှာရပ်တည်နေတာက စင်ကာပူနိုင်ငံဖြစ်ပြီး ရင်းနှီးမြှုပ်နှံမှုတန်ဖိုးက အမေရိကန် ဒေါ်လာသန်း (၁၆၀၀၀)ကျော်ရှိနေတာဖြစ်ပါတယ်။စင်ကာပူနိုင်ငံရဲ့ ရင်းနှီးမြှုပ်နှံမှု တန်ဖိုးဟာ နိုင်ငံခြားရင်းနှီးမြှုပ်နှံမှု စုစုပေါင်းရဲ့(၂၃)ရာခိုင်နှုန်းကျော်အထိရှိတယ်လို့သိရပါတယ်။မြန်မာနိုင်ငံရဲ့ နိုင်ငံခြားရင်းနှီးမြှုပ်နှံမှုစာရင်းရဲ့နံပါတ်(၃)နဲ့(၄)နေရာမှာတော့ နောက်ထပ် အာရှနိုင်ငံတွေဖြစ်တဲ့ ထိုင်းနိုင်ငံနဲ့ဟောင်ကောင်တို့ကရပ်တည်နေတာဖြစ်ပြီး နံပါတ်(၅)နေရာမှာတော့ အမေရိကန်နိုင်ငံ ရှိနေတာပါ။

နိုင်ငံခြားကုမ္ပဏီတွေအနေနဲ့မြန်မာနိုင်ငံမှာရေနံနဲ့ သဘာဝဓာတ်ငွေ့လုပ်ငန်း၊ စွမ်းအင်လုပ်ငန်း၊ ပို့ဆောင်ဆက်သွယ်ရေးလုပ်ငန်း၊ ကုန်ကြမ်းထုတ်လုပ်တဲ့လုပ်ငန်းတွေနဲ့ ဟိုတယ်နှင့်ခရီးသွားလာရေး လုပ်ငန်းအပါအ၀င်လုပ်ငန်းဆယ်မျိုးကျော်ကို လုပ်ကိုင်နေကြတာဖြစ်ပြီး လုပ်ငန်းပေါင်း(၁၂၀၀)ကျော်ကနေ ရင်းနှီးမြှုပ်နှံမှုတန်ဖိုး အမေရိကန်ဒေါ်လာသန်း(၇၀၀၀၀)ကျော်ရှိတယ်လို့သိရပါတယ်။

 

 

Related News