ပြင်သစ်နဲ့ဗြိတိန်နိုင်ငံခေါင်းဆောင်တို့ဟာ အင်တာနက်လူမှုကွန်ယက်ကနေတဆင့် အစွန်းရောက်မှုကို နှိမ်နင်းမယ့် အကြမ်း ဖက်မှုတိုက်ဖျက်ရေးအစီအစဉ်ကို ကြေညာလိုက်ပြီ ဖြစ်ပါတယ်။ ပဲရစ်မြို့မှာ ဗြိတိန်ဝန်ကြီးချုပ် ထရီဆာမေနဲ့တွေ့ဆုံပြီးတဲ့နောက် ပြင်သစ်သမ္မတ မက်ခရွန်က ပြင်သစ်-ဗြိတိန်နိုင်ငံတို့ဟာ အကြမ်းဖက်ဝါဒဖြန့်မှုကို ဖြေရှင်းဖို့ အင်တာနက်လူမှု ကွန်ယက်တစ်ခု တည်းနဲ့မလုံလောက်ဘူးလို့ ဆိုပါတယ်။ ဒါပေမဲ့ အင်တာနက်မှာ အမုန်းတရားနဲ့ မကြမ်းဖက်မှုကို ကာကွယ်တာဟာ အဓိက စီမံချက်တွေထဲကတစ်ခုဖြစ်တယ်လို့ သမ္မတ မက်ခရွန်ကပြောပါတယ်။ အွန်လိုင်းခြိမ်းခြောက်မှုကို ကိုင်တွယ်ဖြေရှင်းဖို့ ပိုမိုလုပ် ဆောင်သင့်တယ် ဆိုတာကို သမ္မတ မက်ခရွန်နဲ့သဘောတူညီထားတယ်လို့ ၀န်ကြီးချုပ် ထရီဆာမေက ပြောပါတယ်။

ဒါ့ပြင် ဗြိတိန် အစိုးရဟာ လူငယ်တွေရဲ့စိတ်ကို အဆိပ်ဖြစ်စေမဲ့ အစွန်းရောက်ဝါဒဖြန့်တာတွေ မပျံ့အောင် အင်တာနက်လူမှုကွန်ယက် ကုမ္ပဏီတွေနဲ့လက်တွဲလုပ်ဆောင်နေတယ်လို့ ၀န်ကြီးချုပ်မေ က ပြောပါတယ်။ ဒါ့ပြင် သက်ဆိုင်ရာအဖွဲ့အစည်းတွေအနေနဲ့ သူတို့ ရဲ့ကွန်ယက်တွေ မှာ ထိခိုက်မှုရှိစေတဲ့ အကြောင်းအရာတွေကို ဖယ်ရှားတာမျိုးလို တာဝန်ခံမှုတွေရှိလာအောင် လုပ်သွားဖို့ ပြင်သစ်နဲ့ဗြိတိန်နိုင်ငံတို့ကြား သဘောတူညီချက်ရရှိထားတယ်လို့လည်း ၀န်ကြီးချုပ်မေက ပြောပါတယ်။ တာဝန်ခံမှုတွေထဲမှာ နည်းပညာကုမ္ပဏီကြီးတွေအနေနဲ့ လက်မခံနိုင်လောက်တဲ့ အကြောင်းအရာတွေကို ဖယ်ရှားဖို့ ပျက်ကွက်တယ်ဆိုရင် ဒဏ်ငွေ ပေးဆောင်ရနိုင်တဲ့အရေးယူမှု တွေလည်း ပါလာနိုင်ပါတယ်။

 

Related News