ဂျပန်နိုင်ငံအနောက်ပိုင်း၊ ကာဂါဝါစီရင်စုမှာရှိတဲ့ မွေးမြူရေးခြံတွေမှာ သေဆုံးခဲ့တဲ့ တိရစ္ဆာန်တွေကိုစစ်ဆေးမှုတွေပြုလုပ်ခဲ့ရာမှာ ကြက်ငှက်တုပ်ကွေးရောဂါပိုးတွေ့ရှိခဲ့တဲ့အတွက် ရောဂါပိုးကူးစက်ခံထားရဖွယ်တဲ့တိရစ္ဆာန်တွေကို ဂျပန်အာဏာပိုင်တွေက စစ်ဆေးနေကြပါတယ်။အခုတွေ့ရှိခဲ့တဲ့ဗိုင်းရပ်စ်ပိုးက H5 အမျိုးအစားဗိုင်းရပ်စ်ပိုးဖြစ်တယ်လို့ ဇန်န၀ါရီလ(၁၁)ရက်မှာ ဂျပန်အာဏာပိုင်တွေက အတည်ပြုခဲ့ပါတယ်။

ဇန်န၀ါရီလ(၁၀)ရက်မှာ ဆာနူကီမြို့ကမွေးမြူရေးခြံ (၁)ခြံမှာ ကြက်(၅၅)ကောင် သေဆုံးနေတာကို တွေ့ခဲ့ရတဲ့အတွက် စစ်ဆေးမှုတွေစတင် ပြုလုပ်ခဲ့တာပါ။ ရောဂါပိုးတွေ့ရှိခဲ့တဲ့ ကြက်ကောင် ရေ(၉၁၀၀၀)ကျော်ကို စီရင်စုအာဏာပိုင်တွေက ရှင်းလင်းရေးလုပ်နေကြပါတယ်။

ရှင်းလင်းရေးလုပ်ငန်းစဉ်တွေ နောက်(၁)ရက်ထပ်လုပ်သွားမှာဖြစ်ပြီး ရောဂါပိုးတွေ့ရှိခဲ့တဲ့မွေးမြူရေးခြံတွေရဲ့ (၁၀)ကီလိုမီတာပတ်ဝန်းကျင်မှာ ကြက်နဲ့ကြက်ဥ တင်ပို့တာကိုလည်း ပိတ်ပင်ထားပါတယ်။ မွေးမြူရေးခြံတွေအတွင်းရောဂါပိုးတွေ့ရှိခဲ့တာဟာ အခုနှစ်ဆောင်းရာသီကာလအတွင်း ဂျပန်နိုင်ငံမှာပထမဆုံးအကြိမ်ဖြစ်တယ်လို့ သိရပါတယ်။ 

 

 

 

 

 

Related News