သစ်သီးဈေးကွက်အတွင်း ထိုင်းစိုက်ပျိုးရေးသမားတွေနဲ့ တရုတ်သစ်သီးကုန်သည်တွေကြား စာချုပ်ချိုးဖောက်မှုတွေဖြစ်နေလို့ စည်းမျဉ်းတွေ တင်းကျပ်ဖို့စီစဉ်နေတယ်ဆိုပြီး ထိုင်းစီးပွားရေးဝန်ကြီးဌာနက ပြောပါတယ်။ထိုင်းနိုင်ငံစီးပွားကူးသန်းဝန်ကြီးဌာနဟာ  သစ်သီးလက်ကားရောင်းဝယ်ရာမှာ ပိုပြီးစည်းကမ်း တင်းကျပ်တော့မှာဖြစ်ပါတယ်။ တရုတ်ကုန်သည်တစ်ဦးက ထိုင်းစိုက်ပျိုးရေးအယောက်(၄၀၀)ဆီကနေ သမင်မျက်လုံးသီးတွေဝယ်ယူဖို့ သဘောတူညီထားတဲ့ စာချုပ်ကို ချိုးဖောက်ခဲ့ပြီးနောက် ၀န်ကြီးဌာနက စည်းကမ်းတင်းကျပ်ဖို့ ဆုံးဖြတ်လိုက်တာဖြစ်ပါတယ်။ ထိုင်းစိုက်ပျိုးရေး သမားတွေ ဆီက၀ယ်ထားတဲ့သမင်မျက်လုံးသီးတွေအတွက် ကျသင့်တဲ့ထိုင်းဘတ်ငွေသန်း(၂၀၀)ကိုပေးချေဖို့ တရုတ်သစ်သီး ကုန်သည်ဘက်ကငြင်းဆိုခဲ့တာပါ။
 
သဘောတူညီမှုပယ်ဖျက်တဲ့ကုန်သည်တွေကို ကာကွယ်ဖို့ စည်းမျဉ်းမူကြမ်းတစ်ခုကို ရေးဆွဲတော့မှာ ဖြစ်တယ်လို့ ထိုင်းပြည်တွင်း ကုန်သွယ်ရေးဌာနရဲ့ ညွှန်ကြားရေးမှူးချုပ် ဘန်ညာရစ် ကာလေယန်နာမစ်က ပြောပါတယ်။ တရုတ်ကုန်သည်တွေက သစ်သီးတွေကို ထိုင်းလယ်သမားတွေဆီက တိုက်ရိုက်ဝယ်ယူခဲ့ပြီး ထိုင်းဈေးကွက်ကို စတင်ထိုးဖောက်ဝင်ရောက်ခဲ့ကတည်းက စာချုပ်ချိုးဖောက်မှုတွေ ရှိနေတာ ဖြစ်တယ်လို့ ထိုင်းလယ်သမားတွေက ပြောပါတယ်။ 
 
တရုတ်လုပ်ငန်းစုတွေဟာ ထိုင်းဈေးကွက် ရှယ်ယာတွေကို ထိန်းချုပ်နေပြီး ပြည်တွင်းသစ်သီးဈေးကွက်ကို ချုပ်ကိုင်နေတယ်လို့ ထိုင်းစီးပွားရေး ပညာရှင်တွေက ပြောပါတယ်။ ထိုင်းနိုင်ငံတွင်း တရုတ်သစ်သီး ကုန်သည်(၁၀၀၀)ကျော်ဟာ သစ်သီးဈေးကွက်ကို လက်ဝါးကြီး အုပ်ထားပြီး ဈေးကစား နေကြတယ်လို့ ကျွမ်းကျင်သူတွေက သုံးသပ်ပါတယ်။ တရုတ်ကုန်သည်တွေဟာ တရုတ်လူမျိုးတွေ ကြားထဲမှာ လူကြိုက်များတဲ့ ဒူးရင်းသီးနဲ့ 
မင်းဂွတ်သီးတွေကို ထိုင်းဈေးကွက်ထဲကနေ ၀ယ်ယူလေ့ရှိပါတယ်။
 
 
 
 

Related News